زرت فرعهم الي في الظهران مول وزي ماقال اخوي. وانا ازيد اذا مضطر تاكل عندهم لاا تطلب الا بيتزا ، طلبت سيفن. وبدلته لطعمه الرديئ وطلبت ببيبسي. نفس الشي ماكملته. الحلقات بالبصل ماكانت مستوية وخليته يسويها. مره تانيه. ، الاجنحه. مع الصلصة كان طعمها كانها مخزنه من زمااان. حتى البيتززا نص ونص. مادري هل الفروع االاخرى كذا

جداً جداً جداً
سيئه لدرجه عطيتهم فرصه ثلاث مرات اجيهم ونفس الشئ تنتظر احد يجيك ويعطيك المنيو امداك تعشيت وطلعت من كثر مايتاخرون
بس الأكل كويس عندهم
وحتى تيك أوت يتاخرون جداً
يعني اطلب وروح لهابير بنده وخلص أغراضك هههه

صحيح ان جيتهم متأخر الساعة 12وربع بس مايحقله ان الببسي يكون حار ولا عندم ثلج وفوق هذا يجب البطاطس الى اخر القلي يعني صغار ومليان زيت وخدمة زفت زفت والله الى درجة انهم غسلو المحل وانحنا فيه ومستعد ان احطلكم فديو بس المشكلة الموقع مايدعم الفديو والحمد لله اني ماطلبت سلطة لانة قدام عيني طلع السلطة الى في البار وقام يغطيها بالقسدير يعني انتبهو من السلطة اكيد اناه بايتة
الفديو في ايباد خويي وانشاء الله اقعلكم صور واحطها ولا كن اخيرا البيتزا حلوة تركبتها ولا كن المكونات سيئة الجودة في الاخير لا انصح بالمحلي خذ بيتزا وبس وانحاش لبيتكم

النظفة سيئة في اوقات الزحمة وغيرها وجودة الكل لك عليها

البيتزا لذيذه لكن الباقي لا
تقديم الطعام سيء و نظافة المطعم دون المستوى بكثير
رخيص بالنسبه للمطاعم الثانيه
مااعجبني

افضل شي جربتة بيتزا الجبنه مع اطراف جبن رهييبه ولذيذه جدا

كانت لي زياره بالصدفه لـ بيتزاء كومبني
فرع العليا شارع موسى بن النصير
المطعم يعيبه الازعاج فقط ..
الطلبات بييتزاء الاجبان / بيتزاء باربكيو دجاج / فوتشيني / بطاطس ودجز / فاهيتا لحم / عصيرات
الطعم جيد كان عددنا 4 وكلهم اعجبهم الاكل 3>

أحنا من عشاق البيتزا بس بعد بيتزا كومباني لا تدورون بلا هت بلا دومينوز خاصه بيتزا خضار لذيييييذه

- بيتزا مميزة ورائعة ، وقائمة متنوعة من البيتزا.
- المأكولات الأخرى قد تكون أقل من جودة البيتزا.
- الخدمة متذبذبة ، أحياناُ سيئة وأحياناً لا بأس بها.
- التأخر في تجهيز الطلبات سمة واضحة فيه.

إذا كنت من محبي البيتزا أنصحك بتجربته .

زرت المطعم مؤخرًا فرع مجمع الظهران

بإختصار لا تطلب غير بيترا لأن الطلبات الثانية مو بالمستوى المطلوب

جرب مكرونة الفوتيتشيني و كانت عادية جدًا و طلبت خبز فرنسي بالجبنة و الديك الرومي برضو كان عادي

و طلبت بيتزا دبل بيبروني و كانت ممتازة

زرته مره وحده وماحبيته .. ماااصل وأحس كل شي معاد تسخينه... بس زيارتي له كانت قديمة فيمكن تحسن الحين بناء على تقييماتكم المرتفعة له

بيتزا غير احب خدمتها ومدرائها

الاكل لذيذ ولكن يتصف بالدسم الزائد .. اما المطعم فلم يحز على اعجابي .. رائحة الزيوت تملئ المكان

المطعم جربته اول مافتح يوم فرع العليا مع موسى بن نصير والله اني اكل وانا متغصب كان الطعم الله يكرم النعمة

ورحت له قبل فترة فرع صحارى مجبور وانا في داخلي متأكد ماراح يجوز لي بس رحت مع العيال لانهم قالوا ماعليك والصراحة جربت البيتزا فرق السما والارض احلى مليون مرة اكلها وانا مستانس الصراحة المقبلات ماكليت الا اصابع الموزريلا تستهبل تذكرني بايام عز 2 في 1 خيالية

اكثر الاخوان زارو بيتزا كومباني الي في خريص بلازا

المشكله هذاك الفرع من جد زحمه على طول ولا يكاد تحصل لك مكان طبعا للعوائل بالنسبه للعزاب يكون جيد

وهذي الزحمه تسبب لهم ارباك

طيب هذا عذر جيد لهم

لكن الحق ينقال

لا البيتزا اعجبتني ولا مقبلاتهم مع اني ماكلها فرش عندهم

وفعلا الخدمه سيئة والمكان ضيق اتمنى يتحسن الوضع عندهم وايضا تغيير جوده الطعام

ومشكله الهنود انهم مايعطونك خدمه جيده العماله فيهم هنديه وفلبينية

والمشكله الثانيه في قسم العوائل بينك وبين الطاوله الي جنب طاولتك ليس خلفك ولا أمامك بل جنب طاولتك ستاره فقط يعني اي سوالف تبي تسولفها مع ام العيال بيسمعون جيرانكم ويقلطون معكم

هذا اذا ماكانت جالس جنب بنات مهسترات ودخلت يدها مع الستاره وقالت لو سمحت ممكن الملح

هههههههههه


تحياتي لكم

أنا الآن موجود في بيتزا كومبني .. الساعة ٢ ونصف...
بداية غير موفقة.. لا يوجد نادل يخدمنا، وانتظرنا طويلاً لما جاء... نفسيته سيئة.. ويكلمنا بدون نفس..
طلبنا بيتزا دجاج وببيروني وخبز بالثون وسباقيتي وفيطيرة ديلوكس وببسي..
......
اخيراً بعد ٢٥ دقيقة .. جت البيتزا والببسي والمكرونة.. والفطيرة..
...
الخبز بالثوم.. توه يوصل.. بعد ٣٥ دقيقة من وقت الطلب!
....
تقييم الطعام:

السباقيتي:
اعجبت اخواني.. بالنسبة لي كانت معقولة.. بس مقارنة باخر مره رحت للمطعم (قبل سنة) كانت اقل من المستوى

بيتزا ببيروني:
حلوة.. بس مو وااو.. مقارنة بدمومينز.. اعتقد انها اقل مستوى

بيتزا الدجاج:
ايضاًً معقولة... بس مو واو..

فطيرة ديلوكس:
تعبير اخواني " جااااامدة "

خبز الثوم:

سئ جداً.. ما اعجبنا ابد..

بشكل عام:
التجربة اقل من المستوى... كان من المطاعم المفضلة عندي.. ولكن مستواهم نزل...
وموضوع الخدمة.. لازم يتعدل!! لحد الا ما جاء يسالنا عن الاكل.. او نحتاج ريفل !!

الباستا البحرية بالكريمة البيضاء جناااااااااااااااااااااااااااااااااااااااااان الدنيا فيها تهببببببل يممممممممممم
بيتزا بالباذنجان والجبنة البيضاء خطيييييييييييرة نسيت اسمها؟؟؟؟
المقبلات خطيييييييييييييييرة
بصراحة أحب أروح لها دااااااااايم ومن المطاعم اللي أشتاق لها
افضل باستا وأفضل بيتزا؟؟؟؟؟

البيتزا رائعة ..
لكن السعر مبالغ فية نوعا ما ..

هو عبارة عن مطعم تايلندي.. كان وكيل لبيتزا هت في تايلند لمدة 25 سنه وبعد ال 25 سنه رفضت بيتزا هت تجديد العقد حسب شروط معينه فما كان من صاحب الامتياز الا ان قام بتصميم ماركه جديده وتحويل جميع فروع بيتزا هت السابقة الى فروع بيتزا كمباني.. اعتقد ان فواز الحكير لما زار كان متفاجئ بانتشار الفروع وظن ان الانتشار نابع من نجاح.

في رأيي انها أسؤ بيتزا ذقتها. صور المنيو حلوه والواقع مختلف. كلما اطلب شي في الصورة شهي ولما يجيني يكون قبيح ولا له طعم.

لو اقدر احط فيه مليون لايك احط لانها البيتزا الافضل والباستا الافضل

الحين تغير سواء الباستا اللي احبها واطلبها دايما .. او البيتزا او خبز الثوم

يمكن بيتزا السي فود للان ما تغيرت كثير

بس يكفي الباستا واسمها كاربونارا فرقت علي كثير

فـ كنسلنا المطعم من القائمة

عندهم بيتزا بربيكيو الدجاج طعمها خيااااال مع اطرااف الجبنه

وبعد جوانح الدجاج مع صلصة الباربيكيو مررره حلووهـ

البيتزا رائعه وسعرها مناسب لكن حجمها اصغير شوي من الباقين
ولكن يظل المطعم رائع ويستحق العوده دائما
كل اللي جربته عندهم كان ممتاز

طعم لذيذ ونكهة مميزة

صحيح جلساتهم مو مريحه مرهـ

بس اكلهم حلو

والسلطات ما فيه شئ جديد حتى ورق العنب اللي عندهم من المعلب مو تصليحهم

بس البيتزا كلام ثاني

اكلت من كذا فرع في الرياض والبحرين وكلها حلوووووووووووووووووهـ

10 10

طلبت مره عندهم فتوتشيني وطلعلي وجبه مدري وش تبي كانها قصبان الخروف ..الحمد لله على النعمة

تفوق على بيتزا هت وكل مطاعم البيتزا الثانيه حتى اسعاره حلوه مقارنه بالجوده

رائع جداً

و الأروع التشكن وينجز ..
والبيتزا الديلوكس (الفطيرة) .

فرع الجفير مريح وكبير والجلسات حلوه
لكن فرع الرفاع ضيق ولا فيه جلسات مقبوله
ذقت عندهم انواع البتزا
ميدترانيان خضار : فيها باذنجان محمر و فلفل احمر بارد,طماطم, جبنه فيتا, زيتون
في المره الاولي كان الشيف كريم كميه الباذنجان والجبن كانت مشبعه لكن في فرع الرفاع الظاهر الشيف عندهم قاصره عنده المقادير لكن عموما هي بيتزا متميزين هم فيها
وذقت تشيكن تريو: دجاج محمر ودجاج باربيكيو ودجاج متبل بزبده الثوم وفطر
الدجاج فيها كميته بسيطه رغم اختلاف انواعه
انصح بالمديترين بيتزا لمحبي تذوق الجديد
البيتزا الكرسبي (الضعيفه) خفيفه ولذيذه وطعمها اشبه بطعم البسكويت
مشكلتهم هي حاجتك للانتظار والصبر الي ان تجهز وجبتك

اوافقكم الرأي المطعم خرافي سواء البيتز او الباستا ،، والمقبلات

واكثر شئ اعجبني انه لو تبي نوعين بيتزا وانت تكفيك حبه وحده ممكن تخلي البيتزا الوحده مقسومه بانص نوعين مختلفين

صرت اسويها دايما : ) عندهم

المطعم في مكان متميز (( شارع العليا ))
الجو الداخلي من جد يعطيك شعور رائع ،،

بصراحة البيتزا فيه لها طعم غير ،،
جربت عندهم انواع كثيرة من البيتزا ،،
مافي شي عندهم ما اعجبني من البيتزا (( من ناحية الطعم والجودة ))
إللي ضايقني عندهم إن البيتزا اصغر من غيرهم ،،
يعني البيتزا الوسط ،، كأنها صغير عند غيرهم ،،،


ما ادري هل ذاك اليوم الشيف مو مروق !! مدري


ممممممم


متميزين بالأطباق الجانبية ،،
الباستا انواع واشكال ،،
جربت الكثير منها ،،
روووووعه ،،
بس ما اعجبتني بودرة الجبن إللي فوق ،،
ريحتها مش ولا بد ،،


في نوع من الباستا بكريمة بيضا ،،

شي جناااااااان ،،

المقبلات ،، حدث ولاحرج ،،
اجنحة دجاج ،،
اصابع موزورولا ،،
بصل ،،
بطاطس ،،
وكثيييير اشياء ،،





كان عندهم ف يالطرف محل يبيع آيس كريم داخل المحل ،،
بس مالقيته آخر مرة !!
هذا الثاني كان روعه ،،



يعني زبدة الكلام ،،

مطعم يستاهل الروحة ،، ويستاهل يكون نوع من التغيير


تحية

ألذ شي :
1 - فيجتبال كلاسيك : عباره عن بيتزاء خضار جداً لذيذه .
2 - بيتزاء بالباذنجان .. لا يغركم الشكل ، طعمها مجنون .
3 - الباستات حقتهم مره حلوه .

جلساتهم : مو مريحه مره

أسعارهم : رخيصه ! يعني أطلب و أنت مرتاح : )
3 بيتزاء + 3 باستا = 200 ريال !