طبعا المكان يملكه ويديره شخص اسمه ( سعد البلحي ) وهو صاحب الفكره حسب تعريفهم في المنيو-وتلقون صوره ملصقها عالجدران يترزز فيها مع شخصيات معروفه داخليا وخارجيا مصور معهم بالمطعم وهو لابس البشت
حقيقة اول مادخلت انا وعيالي على طول جمركنا الاستقبال بمبلغ 10 ريال على كل شخص يقول ذي رسوم دخول فقط يعني كان الاجمالي لنا 30 ريال ( طيب ليش يااستغلالي انت حاط رسوم على الاكل 15% ؟؟ او يعني يلطشنا من هنا ومن هنا-بصراحة وش خليت للبنانين ياأخ سعد البلحي؟
والمشكله انا لو ادفع على مقابل كان هانت علي-يعني لو يقدم لي شي مقابل رسم الدخول كان يمكن يمشي الحال-مثلا يعطيني كتيب عن التراث او صوره تذكاريه (للمعلوميه ترا التصوير ممنوع عندهم)- ..لكن اقول للعمال طيب مافيه ضيافه على الاقل, قال اجلس عند القهوجي ونصب لك من الدله فنجال وتقعد تشربه بمكانك ولاتحرك, قلت طيب انا مااشرب قهوه ماحبها ياخي عطني شاي قال لا, الشاي لازم تدفع حق براد؟؟؟؟؟ )
طيب انا والله داخل ابي اتعشى بس مابي زيارة المتحف يعني حط رسوم الدخول بالدور الثاني عند متحفك الخايس الي والله مدري وش يبي وبكذا يكون معك حق انك تاخذ رسوم دخول( بس حتى العشره ريال والله كثيره في المتحف-يعني لو 3 ريال ممكن-وعن نفسي لو حتى يقولون لي بلاش والله مادخله-ممجمع بنادق قديمه على شوية قواطي على صحون من الي كانت بمطبخنا زمان وخرابيط ماتساهل انك تضيع وقتك عليها
والحين عاد جينا للاكل:
جلسنا بغرفه وننتظر احد يجينا وننتظر وننتظر ولاجاء احد ف رحت لهم بنفسي وقلت تكفى عطوني منيو جوعان ابي اتعشى-مع العلم اننا جايين في وسط الاسبوع بأيام دراسه لاهو عطله ولاشي عشان نقول زحمة-وبعد مااخذت المنيو وجلست اختار لقيت فيه كبسه زمان نصف حبه دجاج مع الرز ب 40 ريال=تجي مطبوخه بنكهة الرمان
قلت بس هذي باجربها حتى لوكان السعر عالي ومبالغ فيه معليش ,,قال الجرسون هذا الطلب لازم يبغاله ساعه كامله عشان يجهز!!!
اخترت طلب غيره قال نفس الكلام يبيله ساعه -- والله هذا الي حصل
بالاخير طلبت كبسة القرية المميزه (حسب مسماهم في المنيو) و والله لاكانت مميزه ولاشي
وسعرها نص دجاجه مع الرز ب 35 ريال
وطلبت صحن جريش بالدجاج (كان الدجاج مفتت بالجريش يعني شي قليل) سعرها ب20 ريال
وكل الطلبات ماكان فيها اي شي مميز وبالعكس السعر عالي جدا وفوق هذا كله ياخذ عليك 15% خدمه-يعني انا ماني فاهم قضيت رسوم الخدمه هذي على اي اساس يحطونها المطاعم وعلى ايش؟ اذا كان خدمتهم زي الزفت- تكرمون
بالختام الله لايجزا صاحبي خير لانه هو الي نصحني اني اروح لها المكان وانا رحت على كلامه بس من غير لايكون عندي فكره مسبقه عن هالمطعم ..لانو بصراحه مايستاهل انك تروح له

المطعم جيد وخصوصاً اني جربته في أوقات متفرقة


ماتغير الخدمه أو الجوده ..

لكن اسعار الدخول الواجب تلغى لأنهم ياخذون 10% رسوم خدمه

ويخلون التذاكر للدور الثالث فما فوق..

أيضاً الجلسات لو تتجدد يكون أفضل..

المطعم فيه متحف يعرض الاشياء القديمة المستخدمة في السعودية ، اكلهم طيب خاصة انهم يستخدمون لحم نعمي .
يعيب المطعم انه:
- يأخذون 10 ريال تذكرة دخول للمطعم والمتحف.
- الاسعار غالية.

1- المفروض يتم تقسم المطعم والمتحف , يعني المتحف يكون له رسوم 10 ريال او ايا كانت والمطعم بدون رسوم لانه مطعم .

2- يعيب المطعم اكله شعب بحت واصنافه قليله لا يرضي جميع الاذواق يعني اذا ماتحب الرز لاتتعب نفسك .

3- الانارة بالغرف وخاصة بالليل سيئة , يعني فكرة الطابع القديم حلوه لكن بالامكان ادخال انارة افضل من هذي , لان الغرفة بالكاد تكون مظلمة والانارة تعكس على الديكور الداخلي .


المكان بشكل عام يعتبر معلم سياحي يستحق الزيارة على الاقل مرة واحدة .

الكريه فيه ان دخوله برسوم على ايش على متحف مايسوى

والاكل جيد فيه نوعا ما

37.5 من 100 ) معدل التقييم الصحي ( للنقاط التالية )
____________

30 من 100 ) المكان العام / النظافة

30 من 100 ) طريقة التموين / النقل / التخزين

30 من 100 ) طاقم الاستقبال / النادل ( الجرسون )

30 من 100 ) طاقم الإعداد والطبخ

10 من 100 ) عـمال النظافة / غسيل الأواني

50 من 100 ) الجودة النوعية و الصحية لأواني الطبخ / الحفظ

60 من 100 ) الجودة النوعية و الصحية لأواني التقديم

30 من 100 ) الجودة النوعية و الصحية لـ / الملاعق و الشوك و السكاكين

60 من 100 ) الجودة النوعية والصحية لأوعية الطلبات الخارجية ( السفري )

45 من 100 ) التقيد باستخدام الأوعية البلاستكية ذات الجودة العالية / الموافقة للتصنيف الصحي

الاكل عادي جدا غالي على مستوى الاكل
جابو لنا عظم مو لحم ههههه بعدين جابو لنا قطعة لحمة تعويض
ماراح نرجع له مرة ثانية

أكلهم متنوع وطيب

جلساتهم شعبية وحلوة

يعني لاتندم على زيارته

خصوصاً سوف ترى صور شخصيات كبيرة زارت المطعم كـ الملك عبدالله والكثير من وجهاء البلد