تقييم

من أكثر الأشياء اللي نعاني منها في مكة هي قلة المطاعم الممتازة بشكل عام و قلة المتخصصة منها في مطبخ معين بشكل خاص..

فنضطر في كثير من الأحيان ننزل على جارتنا جدة عشان نلاقي مطعم يرضي حاسة التذوق و يطفئ كفر الجوع!

فننصدم بزحمة جدة و مسافة الطريق إلى المطاعم في وسط جدة و التحلية و الأندلس و صاري و غيرها... أنواع ضيق الصدر و المشورة!

إلين عرفنا شيزان فرع الحمراء.

مناسب جدا لأنه قبل ما تدخل في معمعة الزحمة حقت دوار السفن و شارع الأندلس.. و حتى طريق الرجعة تقريبا من غير إشارات.

"من بعد ما تنتهي من كبري الميناء خليك ماسك اليسار و ادخل يسار من التقاطيع.. عند الدوار روح يمين.. و طول قدام إلين ما بعد سوق الحمراء.. الدخلة اليمين اللي قبل الإشارة اللي عند أبو شقرا"

اقتراحاتي للطلبات:
- جمبري جينغا
- رز برياني دجاج
- دجاج كورما
- خبزة نان

تكلفة اقتراحي تقريبا 140 - 160 على حسب مشروبك + ما ننسى انه الطلبات تجي بكميات وافرة جدا +

و بالهناء و العافية..