الصورة الشخصية للعضو عبدالله ابو نوره
  • عبدالله ابو نوره

  • العلامات: +6


لاتوجد صور

مميزات وعيوب Burger Nook

السلام عليكم ..

هذي أول مرة اكتب هنا, وأول مرة اجرب مطعم من النت .. شكرا موقع قيم و الشكر موصول للأعضاء.

بحسب ماسمعت من الأعضاء عن افضل الوجبات عندهم , جيتهم اليوم وطلبت برجر هيدن تشيز و برجر اوف سايد و بطاطس .. وهذي قائمة بالمميزات والملاحظات من وجهة نظري:

# المميزات:
1- اللحم "بقري" واضح انه طازج, مش مجمد بخلاف الموجود في مطاعم الوجبات السريعة (في الوجبات السريعة مثل برجر كنج وماكدونالدز مثلا, البرجر مش 100% لحم, تحصل أجزاء غريبة فيها وهذا الشي مش موجود في هذا المطعم).. الزبدة طعمه لذيذ "لمتذوقي البرجر"
2- عمالة لبقة ونظيفة في عملها
3- بإمكانك مشاهدة كل مراحل إعداد الوجبة أمامك ومن خلف لوح زجاجي
4- المطعم ستايله شبابي وجلساته حلوه وبعضها بجانب زجاج المطبخ
5- النظافة العامة, والاحترافية واضحة في هذا المطعم .. ويستحق أن يتطور لفرنشايز

#الملاحظات:
1- حجم البرجر مش كبير ولا صغير بل وسط .. واحس ان سعر البرجر "20 ريال للساندويتش" فوق سعر المتوسط خاصة وان الحبه الوحده ما تشبع, توخر الجوع بس ما تشبع اذا رحت لهم وانت جيعان
2- انا من الاشخاص اللي يحبون البطاطس فرايز ومرة نحيفة .. عشان كذا اشوف البطاطس عادي
3- فيه عيب أن البيبسي و البطاطس حجمهم واحد يعني ما تقدر تكبر وجبتك
4- فيه عيب جدا كبير عندي, ولو جيت هالمطعم قبل ما اقرا تقييم الاعضاء هنا كان غيرت رأيي .. وهو قائمة الطعام, القائمة تفتقر للاحترافية في التصوير للوجبات و تحسها قائمة بوفيه او مطعم صغير .. أنا متأكد ان فيه اشياء حلوه عندهم لكن عدم التسويق لها بشكل جذاب هو السبب في عدم شرائها , فمثلا الهيدن تشيز مافهمت اسمها حتى اكلتها, يعني جبنة داخل اللحم .. الصور جدا مش كويسة. ( لو شفنا قائمة برجر كنج او ماكدونالدز, فيه احترافية عالية في التصوير وتسويق البرجر .. على الأقل يبرز مميزاتها ومكوناتها .. واذا طلبتها في فرق بينها وبين الصورة .. واللي حاصل في برجر نووك هو العكس ).
5- نوعية الكاتشاب والمايونيز وسط
6- ماعندهم خدمة توصيل إلى وقت كتابة هذا التقييم, مع ان الكاشير قاللي أنه بتتوفر هالخدمة بعد شهر من الآن

#اقتراحات:
1- المطعم بحاجة إلى تسويق, لأن اللي يجونه إما يعرفونه أو يعرفون ناس مجربينه وبس .. الإعلان مهم لنجاح أي مطعم, على الأقل عشان نعرف أنه موجود
2- اقترح فتح فرع اخر
3- لو يكون عندهم خدمة طلبات السيارة يكون احلى
4- المطعم بحاجة لعروض عشان يشتهر
5- انا ما دخلت قسم العوائل ومدري فيه عوائل تجي أو لا, لكن اعتقد ان موقع المطعم وحجمه ما يأهل لقسم عوائل يعني ما اعتقد انك تقدر تاخذ راحتك فيه .. ويمكن لو صار كله للعزاب يمكن يكون افضل واكبر

#ملاحظة:
زيارتي للمطعم كانت وقت غداء .. سمعت عن دخان بسبب الشواية ومدري ايش في جو المطعم ما حصلت شي كان الجو كويس .. طبعا ما دخلت قسم العوائل ولا حتى دورات المياه -اكرمكم الله- عشان اقيمها ..

#التقييم النهائي:
اشوفه مطعم حلو, والبرجر اللي يقدمه جودته عالية, السعر شوي غالي يعني فوق الوسط بشوي, لكنه دافن نفسه في تقديم الوجبات في القائمة, يعني لازم تكون مجرب عشان تعرف وش تطلب .. يستحق الزيارة

1 تعليق | هل ترى أن هذا التقييم مفيد؟      نعم

لا يصلح للإستهلاك الآدمي !!!

بصراحة وبدون مجاملات .. المطعم تعبان , قذر , "يجيب المرض"

قبل كم سنة تعشيت من عندهم , كان وقتها بالعطلة الصيفية .. للأسف ماقدرت أنام ليلتها من الألم في المعدة ورحت للطبيب .. قاللي ان هذا تسمم .. "اقسم بالله هذا ما حصل"

قعدت بعدها فترة طويلة يمكن تجاوزت السنتين ما اكلت من عندهم شي, ثم رجعت لهم يمكن تعدلوا .. للأسف هم مثل ما هم .. والمشكلة أنها مش مشكلة في فرع واحد ! لا, جربته في الرياض و في الغربية وفي الشرقية وحتى في حائل .. هم مثل ماهم, وكأنهم متفقين على سوء الأكل المقدم

الناس لازالت تروح لهم اليوم لسببين, اكله رخيص نوعا ما , والسبب الثاني ان اللي يروحون له تعودوا على هذي النوعية من الأكل للأسف ..

انا من سكان المنطقة الشرقية .. وكنت متوقع أن البروستد او الدجاج المقلي واحد .. حتى سمعت عن البيك .. للإسف ماجربته بس كثير يمدحونه

الزبدة: إذا انت جيعان في صحراء وماحصلت الا ضب و وجبة كنتاكي, عليك بالضب

1 تعليق | هل ترى أن هذا التقييم مفيد؟      نعم

لذيذ لكن غالي

زرت هالمطعم اكثر من مرتين لفرعهم في الجبيل الصناعية ..

بصراحة, طلباتهم لذيذة .. حاولت انوع في المرتين, وكل طلب احلى من الثاني .. اعتقد انه من المطاعم النادره اللي مهما طلبت شي من عندهم يكون طعمه حلو .. الا اذا كان عندك حساسية من بعض الطعام او ما تفضل نوعية معينة من الأكل

المكان العائلي والأفراد في الجبيل الصناعية, جدا مناسب و حلو .. كراسي مريحة, وخصوصية تامة للعائلة .. من عيوب قسم العوائل, لا تجيهم يوم أربعاء أو خميس زززززززحمة .. ماراح تحصل طاولة, والخدمة تتأخر وللأسف بعض العاملين "من الجنسية اللبنانية" شايفين نفسهم شوي, وخدمتهم وسط ..

لكن الطعم لذيذ و يبدو ان المطعم نظيف .. لكن ماعندي خلفية عن المطبخ

العيب الوحيد والأساسي .. هو السعر المرتفع للطلبات .. يعني نتكلم عن 200 إلى 150 لشخصين .. وطبعا هو من المطاعم اللي تاخذ نسبة 15% خدمة, لكن هذي الخدمة تعبانة ايام الويكند بسبب الضغط

بالنهاية:: إذا حاب تجرب مطعم حلو وراقي وعنده اكلات بحرية حلوة .. سواء لوحدك, او مع زوجتك, او مع زميلك .. هذا مطعم جيد. غالي شوي بس يستاهل زيارة لمناسبة خاصة

0 تعليق | هل ترى أن هذا التقييم مفيد؟      نعم

اختيار ممتاز للإفطار

هذا المطعم عرفته قبل 3 سنوات تقريبا .. جدا رائع للفطور

أحسن شي عندهم الفول و الشكشوكة .. طعم غير ! .. وخبزهم جداً رهيب .. بالاضافة لشاي بالحليب عدني يكيف المزاج .. مارحت لهم مرة الا واطلب اكثر من شاي واحيانا لما انتهي اخذ معي شاي سفري

الكبدة ماعجبتني مرة ..

المطعم يمني شعبي, بس نظيف مقارنة للمطاعم الشعبية الثانية وعليه زحمة الصباح ..

ما عنده جلسات مريحة .. مع ان عنده كراسي و جلسات ارضيه .. يعني جدا بسيط

واذا تحب تجرب شي جديد وحلو بعد الفطور خذ من عنده شي اسمه "رطب" .. نفس الخبز اللي يقدمه مقطع مع عسل واعتقد فيه شوي سمن .. لذيذ

تقيمي له كمطعم فطور 8 من 10

إذا عندك وقت بين الساعة 9 ونص إلى 10 و نص وتبي تفطر .. هذا احسن وقت لزيارته, يعني يكون خفيف

0 تعليق | هل ترى أن هذا التقييم مفيد؟      نعم

قد تعجبك أيضاً:

روابط مؤرشفة