الصورة الشخصية للعضو سليمان
الرياض
مؤسس @the__pantry و واحد من فريق عمل @QaymRiyadh اسولف عن الأكل و المطاعم، متذوق مخضرم و أقيم الطبق أكثر من المطعم، للتواصل Nbo55th@hotmail.com

متخصصين برسكت ولحم مسحب

لام شانك من المطاعم الجديدة والقليلة اللي تقدم لنا بريسكت مشوية بروقان وعلى مدار ست ساعات عشان تاخذ ملمس يذوب من أول قضمة وهذا اللي قدموه فبمجرد انقضاضاك على القطعة تستمتع بطعم اللحم المتبل بطريقة خفيفة وتحس ببعض لمحات الملح والقرفة على السطح... الشي الوحيد اللي كنت أتمناه هو تقديمها باستواء أكثر احمرار فتقديمها "ويل دن" يمكن يناسب الأغلبية لكن مايناسبني ومع ذالك كان تركيزهم على طعم اللحم بارز بشكل كبير. المحل لازال يتطور وأعتقد لازال يختبر نفسه بعدة أطباق، بالنسبة للمنيو فهم يقدمون ستيك فليه وبرسكت و أضلاع غنم وطبعاً متخصصين بساندوتش اللحم المسحب اللذيذ

بالنسبة للأطباق الجانبية فعندهم أجنحة دجاج و ماكروني اند تشيز. ماجربت الأجنحة بعد التطوير لكن جربت الماك اند تشيز واللي احتاجت اعادة نظر بأنواع الجبن المستخدمة فكانت ذا طابع واحد مايخليني ارجع لقضمة ثانية واحتاجت فتات خبز يعطيها ملمس كرنتشي للإستمتاع بالطبق أكثر

0 تعليق | هل ترى أن هذا التقييم مفيد؟      نعم

كوب كيك تمر لا ينسى

بان بيكري من المخابز السعودية الجديدة اللي تحب الإبتكار والخروج بنكهات لذيذة ومبتكرة. المخبز يقدم عدة اختيارات بطريقة سهلة للقضمة وممتعة ولذيذة لبتلات التذوق، كورسون الماسكربون وكرسون الزعفران يشهدون على النقطة هذي الا اذا انا ذائقتي الشخصية غلبتني في المرة ذي و أيضاً كب كيك التمر اللي تتدرج نكهته من الشوكلاة والدولوسي دولشي للتتمر بسلاسة عكسية لذيذة تخليك ترجع لقضمة ثانية. أكثر شي أعجبني فيهم هو حماسهم لإختبار أنواع عدة من الحلى والمعجنات والخروج من الصندوق في تقديمها مثل فطاير الكوب المالحة والسميط المحشي من دون الفتحة المتوسطة وأيضاً تشيز كيك الفستق عندهم كان أكثر من رائع.

0 تعليق | هل ترى أن هذا التقييم مفيد؟      نعم

العصرية في الديكور فقط لا تكفي

غدوة وعشوة يقدم الأكل الشعبي بشكل عصري ومختص بالمطبخ الكويتي، المطعم كجلسة وأجواء مريح ويعطي طابع شعبي عصري جميل لكن هذي الجلسة فقط، المنيو قصة أخرى.

المنيو مقسمة بشكل جيد بعدة اختيارات شعبية مع بعض الإختيارات خارج النطاق الشعبي ممزوجه مع المكونات العربية لكن للأسف العصرية في الأطباق الشعبية تتمحور حول الشكل من دون مكوناته فنلقى الأطباق الشعبية مقدمه بمكوناتها البسيطة من دون تجديد في مكونات الطبق

طلباتي اقتصرت على....



معدس موزة لحم: قدم بشكل بسيط وجيد بالنسبة للأرز مع دقوس لذيذ و نكهته مفعمه بشكل كامل لكن موزة اللحم كانت مستوية بزيادة وناشفة فكان يصعب أكلها بالشوكة والسكين وكنت أتمنى لو استخدمو اعشاب عطرية و حمصيات تخفف من الزفر في اللحم

سلطة الكنافة بجبن الماعز: الطبق الموعود مفروض يكون سلطة لكن تقديمه تحت سلطة غلطة كبيرة خصوصاً ان الكنافة ملفوفة على شكل مبرومة و موزعه حول طبل سلطة جرجير مع مسحة خفيفة من جبنة الماعز، كان بيكون الطبق مقبول أكثر لو قدم بشكل مقبلات مصفوفة ورا بعض مع ورقة جرجير لكل مبرومة، تقديمه كسلطة اعتبره علامة استفهام تجاه الطبق هل أنا باكل سلطة أو باكل قضمات مبرومة، خصوصاً لما تنتهي قطع المبرومة ويبقى الطبق سلطة خضرا فقط

أيسكريم بالزعفران: كرتين منعشات من الأيسكريم بالزعفران وتجبرك انك تاخذ قضمة ثانية لكن الفستق الممكرمل بالطبق ماناسبني شخصياً، كنت أفضل الفستق مملح بهيئته المحمصة بدل عن كونه محلى.

0 تعليق | هل ترى أن هذا التقييم مفيد؟      نعم

كليجا الوافل إبتكار شعبي لذيذ

زرت المكان قبل يومين للفطور وكانت التجربة لذيذة ومنعشة. المكان صغير وملموم والمنيو متنوعة بأسعار معقولة. البداية كانت قهوة عربية مع تمر خلاص و معمول وبعدها أطباق الفطور الي كانت مصابيب بالحبة السودا, كليجا وافل, تشباتي شكشوكة مانيمان, تشباتي بالبيض والاعشاب مع الجبنة و انهيناها بكاس كرك.

اعجبني تمسكهم بالهوية الشعبية بالمصابيب و كليجا الوافل, المصابيب كانت ممتازة من ناحية التطبيق اما النكهة فتعتمد اذا انت من عشاق حبة البركة. كليجا الوافل إبتكار أعجبني جداً خصوصاً قرب درجة هشاشتها من هشاشة الكليجا الأصليية واستخدام دبس التمر معها يعطيك متعة ونكهة الكليجا بشكل كامل

التشباتي كان ممتاز لكن سميك شوي و أعجتني عجة(اوملت) الأعشاب لكن مانسبني جبن الكاسات فيها أما شكشوكة مانيمان التركية فكانت تجرتي الأولى لها عندهم, حكمي راح يكون (ذوقي) فيها فراح أئجله لوقت أكون متعود على اسلوبها المختلف

الكرك كان ممتاز جداً ومفعم بالزعفران والهيل بشكل واضح ولذيذ

تعليقين | هل ترى أن هذا التقييم مفيد؟      نعم

أعجبني


قد تعجبك أيضاً:

روابط مؤرشفة